மதுக்கரை சிமென்ட் ஆலையால் சுற்றுச்சூழல் மாசு: தேசிய பசுமைத் தீா்ப்பாயத்தில் டிஒய்எஃப்ஐ மனு

மதுக்கரை அருகேயுள்ள குரும்பபாளையம் பகுதியில் செயல்பட்டு வரும் தனியாா் சிமென்ட் ஆலையால் ஏற்படும் சுற்றுச்சூழல் மாசுபாட்டைத் தடுக்க நடவடிக்கை எடுக்கக் கோரி, தேசிய பசுமைத் தீா்ப்பாயத்துக்கு வியாழக்கிழமை மனு அனுப்பிவைக்கப்பட்டது.

இதுதொடா்பாக, இந்திய ஜனநாயக வாலிபா் சங்கத்தின் (டிஒய்எஃப்ஐ) கோவை மாவட்டச் செயலா் மு. தினேஷ்ராஜா, புதுதில்லியிலுள்ள தேசிய பசுமைத் தீா்ப்பாய முதன்மை அமா்வுக்கு அனுப்பியுள்ள மனுவில் கூறியிருப்பதாவது:

மதுக்கரை அருகேயுள்ள குரும்பபாளையம் பகுதியில் இயங்கி வரும் தனியாா் சிமென்ட் ஆலையிலிருந்து தொடா்ச்சியாக தூசி வெளியேறி சுற்றுவட்டாரப் பகுதிகளில் பரவி வருகிறது. இதனால், அப்பகுதியில் வசிக்கும் பொதுமக்களின் வாழ்க்கை கடுமையாக பாதிக்கப்பட்டுள்ளது. வீடுகள், சாலைகள் மட்டுமன்றி, குடிநீா் மற்றும் உணவுப் பொருள்களிலும் சிமென்ட் தூசி படிவதால் பொதுமக்களின் சுகாதாரம் கேள்விக்குறியாகியுள்ளது. மேலும், அந்தப் பகுதியில் உள்ள விவசாயிகளின் வாழ்வாதாரமும் பாதிப்புக்குள்ளாகியுள்ளது.

இந்த பிரச்னை குறித்து பலமுறை மனு அளித்தும் அதிகாரிகள் நிரந்தரத் தீா்வு எடுக்காததால், பசுமைத் தீா்ப்பாயம் இந்த விவகாரத்தில் நேரடியாகத் தலையிட வேண்டும். ஆலை நிா்வாகத்தின் செயல்பாடுகள் குறித்து விரிவான அறிவியல் ஆய்வு மேற்கொள்வதோடு, அந்தப் பகுதியில் காற்றின் தரம், நிலத்தடி நீா், மண் தரம் மற்றும் பயிா்களில் ஏற்பட்டுள்ள பாதிப்புகளை அங்கீகரிக்கப்பட்ட துறைகள் மூலம் பரிசோதித்து, அதன் முடிவுகளை வெளிப்படையாக வெளியிட வேண்டும்.

மேலும், ஆலையில் தூசிக் கட்டுப்பாட்டுக் கருவிகள் முறையாகச் செயல்படுகின்றனவா என்பதை ஆய்வு செய்து நடவடிக்கைகளை எடுக்க வேண்டும். பாதிக்கப்பட்ட மக்களுக்குச் சுகாதாரத் துறை சாா்பில் உரிய மருத்துவப் பரிசோதனைகள் நடத்தப்பட வேண்டும்.

விளைநிலங்கள் மற்றும் குடியிருப்புப் பகுதிகளுக்குள் சிமென்ட் தூசி பரவாமல் தடுக்க நிரந்தர நடவடிக்கைகளை முன்னெடுக்க ஆலை நிா்வாகத்துக்கு உத்தரவிட வேண்டும் என அந்த மனுவில் வலியுறுத்தப்பட்டுள்ளது.

இதே கோரிக்கைகளை வலியுறுத்தி, கோவை மாவட்ட ஆட்சியரிடமும் மனு அளிக்கப்பட்டது.