இன்று ஒரு தகவல்... தாத்தா வென்ற தொகுதியில் பேரன்...!

திமுக சாா்பில் 2026 சட்டப்பேரவைத் தோ்தலில் போட்டியிடும் வேட்பாளா் பட்டியல் சனிக்கிழமை அறிவிக்கப்பட்டது. அதில் கிணத்துக்கடவு தொகுதியில் போட்டியிட கோவை தெற்கு மாவட்ட இளைஞா் அணி அமைப்பாளராகப் பதவி வகிக்கும் கே.வி.கே.எஸ். சபரி காா்த்திகேயனுக்கு வாய்ப்பு வழங்கப்பட்டுள்ளது.

இவரது தாத்தா கே.வி.கந்தசாமி, கிணத்துக்கடவு சட்டப்பேரவைத் தொகுதியில் அதிமுக சாா்பில் போட்டியிட்டு 1977, 1980, 1984 தோ்தல்களில் 3 முறை வென்றவராவாா். இறதியாக 2006 சட்டப்பேரவைத் தோ்தலில் திமுக சாா்பில் போட்டியிட்டு கே.வி.கந்தசாமி தோல்வியடைந்தாா்.

அதன் பிறகு அவா் போட்டியிடவில்லை. 19 ஆண்டுகளுக்குப் பிறகு, கிணத்துக்கடவு தொகுதியில் கே.வி.கந்தசாமியின் பேரன் கே.வி.கே.எஸ். சபரி காா்த்திகேயன் திமுக சாா்பில் இந்தத் தோ்தலில் களம் காண்கிறாா்.

ஏற்கெனவே 2001, 2006, 2011 மற்றும் 2021 தோ்தல்களில் வெற்றி பெற்று, அனுபவம் மிக்க அதிமுக வேட்பாளரான செ.தாமோதரன் 5ஆவது முறை மீண்டும் இத்தோ்தலில் போட்டியிடும் நிலையில், புதுமுகப் போட்டியாளராக தோ்தலைச் சந்திக்கும் கே.வி.கே.எஸ். சபரி காா்த்திகேயன், தாத்தா ‘ஹாட்ரிக்‘ வெற்றி குவித்த தொகுதியில், புதுமுகமாக சாதிப்பாரா என்பது மே 4இல் தெரியவரும்.