தனியாா் கழிவுநீா் வாகன உரிமையாளா்கள், ஓட்டுநா்களுக்கு மருத்துவ முகாம்

கோவை மாநகராட்சி சீதாலட்சுமி நகா்ப்புற முதன்மை சுகாதார நிலையத்தில் தனியாா் கழிவுநீா் வாகன உரிமையாளா்கள், ஓட்டுநா்கள் மற்றும் கிளீனா்களுக்கு சிறப்பு மருத்துவ முகாம் வியாழக்கிழமை நடைபெற்றது.

கோவை மாநகராட்சியில் 5 மண்டலங்களுக்கு உள்பட்ட தனியாா் கழிவுநீா் வாகன உரிமையாளா்கள், ஓட்டுநா்கள் மற்றும் கிளீனா்களுக்கான சிறப்பு மருத்துவ முகாம் மாநகராட்சி சாா்பில் தொடா்ந்து நடத்தப்பட்டு வருகிறது. அதன்படி, மத்திய மண்டலம், 70-ஆவது வாா்டுக்கு உள்பட்ட புரூக்ஃபீல்ட்ஸ் சாலையில் உள்ள சீதாலட்சுமி நகா்ப்புற முதன்மை சுகாதார நிலையத்தில் சிறப்பு மருத்துவ முகாம் வியாழக்கிழமை காலை 10 மணி முதல் மாலை 4 மணி வரை நடைபெற்றது. இம்முகாமில் கலந்து கொண்டவா்களுக்கு ரத்த கொதிப்பு, சா்க்கரை அளவு, கண் பாா்வை, தோல் வியாதி உள்ளிட்ட 10-க்கும் மேற்பட்ட பரிசோதனைகள் மேற்கொள்ளப்பட்டன. இம்முகாமில், 140-க்கும் மேற்பட்ட தனியாா் கழிவுநீா் வாகன உரிமையாளா்கள், ஓட்டுநா்கள் மற்றும் கிளீனா்கள் கலந்து கொண்டு பயனடைந்தனா்.