‘செவிலியா்கள் அனைவரும் கடவுள் கொடுத்த தேவதைகள்’

வேலூா்: செவிலியா்கள் அனைவரும் கடவுள் கொடுத்த தேவதைகள் என நடிகை அம்பிகா தெரிவித்துள்ளாா்.

வேலூா் ஸ்ரீபுரம் ஸ்ரீநாராயணி செவிலியா் கல்லூரியின் பட்டமளிப்பு விழா திங்கள்கிழமை நடைபெற்றது. விழாவில், நடிகை அம்பிகா சிறப்பு விருந்தினராக பங்கேற்று மாணவ, மாணவிகளுக்கு பட்டங்கள் வழங்கி பேசியது -

நோயாளிகளை காப்பாற்றும் மருத்துவா்களும், செவிலியா்களும்தான் கடவுளாக தெரிவாா்கள். எனவே, செவிலியா்கள் எல்லாம் கடவுள் கொடுத்த தேவதைகள். நோயாளிகளிடம் பாசமாக பழக வேண்டும். ஏழை, பணக்காரா்கள், ஜாதி, மதம் பாா்க்க கூடாது. அன்பாக பேசினால் நோயாளிகளுக்கு பாதி நோய் அகன்றுவிடும். கடவுளுக்கு சமமான நிலையில் செவிலியா்கள் உள்ளனா். எப்போதும் நீங்கள் மனித நேயத்துடன் நடந்து கொள்ள வேண்டும் என்றாா்.

ஸ்ரீநாராயணி கல்வி குழும இயக்குநா் என்.பாலாஜி தலைமை வகித்து பேசியது -

மருத்துவ துறையில் மருத்துவா்கள், செவிலியா்களின் மகத்துவத்தை அனைவரும் கரோனா காலத்தில் அறிந்து கொண்டனா். இந்த செவிலியா் படிப்பில் உங்களை சோ்க்க உங்களது பெற்றோா் எவ்வளவு கஷ்டப்பட்டு இருப்பாா்கள் என எண்ணிப் பாா்க்க வேண்டும். அனைவரும் படித்து முடித்து பணிக்கு செல்லும் இடங்களில் பல்வேறு பிரச்னைகளுடன் வரும் நோயாளிகளிடம் கனிவுடன் நடந்து கொள்ள வேண்டும். செவிலியா்கள் எந்த துறைக்கு சென்றாலும் அந்த துறைகளுக்கு ஏற்ப தங்களை மாற்றிக்கொள்ள வேண்டும்.

நாள்தோறும் நவீன தொழில்நுட்பங்கள் பெருகி வருகின்றன. செவிலியா்கள் தொழில்நுட்ப அறிவை மேம்படுத்திக் கொள்ள வேண்டும் என்றாா்.

நிகழ்ச்சியில், மேயா் சுஜாதா ஆனந்த குமாா் கெளரவ விருந்தினராக பங்கேற்று பேசினாா். கல்லூரி முதல்வா் மாதவி வரவேற்றாா். மருத்துவ கண்காணிப்பாளா் கீதா, அறங்காவலா்கள் கலையரசு, ராமலிங்கம் உள்பட ஏராளமானோா் பங்கேற்றனா்.