மகள் மரணத்தில் சந்தேகம்: தந்தை புகாா்

வந்தவாசி அருகே மகள் மரணத்தில் சந்தேகம் இருப்பதாக தந்தை அளித்த புகாரின் பேரில், வடவணக்கம்பாடி போலீஸாா் விசாரணை மேற்கொண்டுள்ளனா்.

வந்தவாசியை அடுத்த கோதண்டபுரம் கிராமத்தைச் சோ்ந்தவா் விறகு வெட்டும் கூலித் தொழிலாளி சக்திவேல். இவரது மனைவி சித்ரா (30). இவா்களுக்கு 2 மகன்கள், ஒரு மகள் உள்ளனா்.

சக்திவேல் தினமும் மது அருந்தி விட்டு வந்து தகராறு செய்து சித்ராவை அடிப்பாராம். கடந்த சனிக்கிழமை இரவு சித்ராவை சக்திவேல் கடுமையாக தாக்கினாராம்.

இந்த நிலையில் அதே கிராமத்தைச் சோ்ந்த சித்ராவின் தந்தை வேலு ஞாயிற்றுக்கிழமை அவரை பாா்க்கச் சென்ற போது, சக்திவேல் தன்னை தாக்கியதையும், தனக்கு கடுமையாக வயிறு வலிப்பதாகவும் சித்ரா கூறியுள்ளாா்.

இதையடுத்து வேலு, சித்ராவை தனது வீட்டுக்கு அழைத்துச் சென்றுள்ளாா். இந்த நிலையில் சித்ரா செவ்வாய்க்கிழமை உயிரிழந்தாா்.

இதையடுத்து தனது மகள் சித்ரா மரணத்தில் சந்தேகம் இருப்பதாக வேலு வடவணக்கம்பாடி போலீஸில் புகாா் அளித்தாா்.

இதையடுத்து போலீஸாா் சித்ராவின் சடலத்தை கைப்பற்றி உடற்கூறு ஆய்வுக்காக திருவண்ணாமலை அரசு மருத்துவக் கல்லூரி மருத்துவமனைக்கு அனுப்பி வைத்தனா்.

இதுகுறித்து போலீஸாா் வழக்குப் பதிந்து விசாரணை மேற்கொண்டுள்ளனா்.