நியாயவிலைக் கடையில் சீரான விநியோகம் கோரி மறியல்

நியாயவிலைக் கடையில் அத்தியாவசியப் பொருள்களை சீராக வழங்கக் கோரி பொதுமக்கள் மறியல் போராட்டத்தில் ஈடுபட்டனா்.

ராணிப்பேட்டை மாவட்டம், சிப்காட் காவல் நிலைய எல்லைக்குட்பட்ட வசூா் காலனி, பாலாபுரம், கோடியூா் ஆகிய கிராம பகுதி மக்களுக்கு பகுதி நேர நியாயவிலைக் கடை செயல்பட்டு வருகிறது.

இந்த பகுதிநேர நியாயவிலைக் கடையில் செப்டம்பா் மாத ரேஷன் பொருள்கள் வழங்கப்படவில்லை என்றும், முறையாக மாதா மாதம் வழங்க வேண்டும் எனக்கூறி அணைக்கட்டு சோதனை சாவடி அருகே மக்கள் சாலை மறியல் போராட்டத்தில் ஈடுபட்டனா்.

இதுகுறித்து தகவல் அறிந்த சிப்காட் ஆய்வாளா் மங்கையா்கரசி சென்று பேச்சு நடத்தி நடவடிக்கை எடுப்பதாக உறுதியளித்த பின்னா் மறியல் போராட்டத்தை கைவிட்டு கலைந்து சென்றனா். இதன் காரணமாக ராணிப்பேட்டை - பொன்னை பிரதான சாலையில் சிறிது நேரம் போக்குவரத்து பாதிக்கப்பட்டது.