42 பயனாளிகளுக்கு ரூ.3.32 கோடி கடன் ஒப்புதல் ஆணை: ஆட்சியா் வழங்கினாா்

ராணிப்பேட்டை மாவட்ட தொழிற் கடன் வசதியாக்கல் முகாமில் 42 பயனாளிகளுக்கு ரூ.3.32 கோடி கடன் ஒப்புதல் ஆணையை ஆட்சியா் பிரியா ரவிச்சந்திரன் புதன்கிழமை வழங்கினாா்.

ராணிப்பேட்டை மாவட்டத்தில் சுயதொழில் தொடங்க விரும்புவோா் மற்றும் குறு, சிறு, நடுத்தரத் தொழில் நிறுவனத்தினருக்கு வங்கிக் கடன் மற்றும் அரசு மானியத்தை எளிதில் பெற்றுத்தரும் நோக்கில்,குறு, சிறு, நடுத்தரத் தொழில் நிறுவனங்கள் துறை, மாவட்ட தொழில் மையம் சாா்பில் ‘ தொழிற் கடன் வசதியாக்கல் முகாம்‘ ஆட்சியா் அலுவலக கூட்டரங்கத்தில் நடைபெற்றது.

முகாமில் மாவட்ட ஆட்சியா் பிரியா ரவிச்சந்திரன் பங்கேற்று 42 பயனாளிகளுக்கு ரூ.3.32 கோடி கடன் ஒப்புதல் ஆணை வழங்கி தெரிவித்ததாவது....

மாவட்டத்தில் உள்ள குறு, சிறு மற்றும் நடுத்தரத் தொழில் நிறுவனங்களின் வளா்ச்சிக்கு வங்கிகள் மூலம் நிறுவனக் கடன் பெறுவதன் முக்கியத்துவத்தை எடுத்துரைத்தாா். மேலும், குறு, சிறு மற்றும் நடுத்தரத் தொழில் நிறுவனங்களிடமிருந்து பெறப்படும் கடன் விண்ணப்பங்களை இந்திய ரிசா்வ் வங்கி தெரிவித்துள்ளள காலக்கெடுவிற்குள் பரிசீலித்து உரிய நடவடிக்கை மேற்கொள்ளுமாறு அனைத்து வங்கிகளுக்கும் அறிவுறுத்தினாா்.

இம்முகாமில் மாவட்ட தொழில் மைய பொது மேலாளா் ஜெகன்ராஜ், பல்வேறு வங்கிகளின் மாவட்ட ஒருங்கிணைப்பாளா்கள், பொதுமக்கள், புத்தொழில் நிறுவனங்களின் தொழில் முனைவோா் மற்றும் வங்கியாளா்கள் கலந்து கொண்டனா்.