அரக்கோணம்: அரக்கோணம் வட்டாரத்தில் நடைபெற்று வரும் வேளாண் விரிவாக்கத் திட்டப் பணிகளை ராணிப்பேட்டை மாவட்ட வேளாண் இணை இயக்குநா் எஸ்.சுந்தரம் ஆய்வு செய்தாா்.

தற்போது ராணிப்பேட்டை மாவட்டத்தில் கலைஞா் அனைத்து கிராம வேளாண்மை விரிவாக்க திட்டப்பணிகள் அனைத்து வட்டாரங்களிலும் நடைபெற்று வருகின்றன. இதில் வேளாண் விதைப்பண்ணை அமைத்தல் உள்ளிட்ட பல்வேறு பணிகள் நடைபெற்று வருகின்றன. அரக்கோணம் வட்டாரத்தில் நடைபெறும் பணிகளை இணை இயக்குநா் எஸ்.சுந்தரம் ஆய்வு செய்தாா்.

மின்னல், பாராஞ்சி, செம்பேடு உள்ளிட்ட பல்வேறு ஊராட்சிகளுக்குட்பட்ட கிராமப் பகுதிகளில் உள்ள பல்வேறு வேளாண் வயல்களையும், விதைப்பண்ணைகளையும் பாா்வையிட்டு ஆய்வு செய்தாா். இதில் பாராஞ்சி கிராமத்தில் விவசாயி அரிநாதன் என்பவரால் 3 ஏக்கரில் அமைக்கப்பட்டிருந்த வம்பன் 10 ரக உளுந்து விதைப்பண்ணையை பாா்வையிட்டு விவசாயிக்கு பல்வேறு ஆலோசனைகளையும் தெரிவித்தாா். தொடா்ந்து இந்த விதைப்பண்ணையை மாவட்டத்தின் பல்வேறு விவசாயிகள் நேரில் பாா்க்கவும் ஏற்பாடு செய்வதாகவும் தெரிவித்தாா். அப்போது இணை இயக்குநருடன் துணை வேளாண் அலுவலா் மாதைய்யன், உதவி விதை அலுவலா் சத்யம், உதவி வேளாண் அலுவலா் முரளி உள்ளிட்டோா் உடன் இருந்தனா்.