டிஜிட்டல் அரஸ்ட் மோசடி மூலம் ரூ.44 லட்சம் பறிக்கப்பட்ட சம்பவத்தில், வங்கி மேலாளா் உள்பட 2 போ் கைது செய்யப்பட்டனா்.

விருகம்பாக்கத்தைச் சோ்ந்தவா் பட்டாபி (83). தனியாா் நிறுவனத்தில் பணியாற்றி ஓய்வு பெற்ற இவரை கடந்த செப். 1-ஆம் தேதி முதல் 12-ஆம் தேதி வரை வாட்ஸ் ஆப் செயலி வாயிலாக தொடா்பு கொண்ட நபா், தன்னை மும்பை மாநகர காவல் துறை குற்றப்பிரிவு துணை ஆணையா் அலுவலகத்தில் காவல் ஆய்வாளராகப் பணிபுரிவதாகக் கூறி, சட்ட விரோதமாக பணப் பரிவா்த்தனையில் ஈடுபட்டுள்ளதாக பட்டாபியை மிரட்டியுள்ளாா். அவரது வங்கிக் கணக்கில் உள்ள பணம் முறையாக பெறப்பட்டிருப்பதை உறுதி செய்ய, அந்தப் பணத்தை சிறிது நேரம் தான் கூறும் வங்கிக் கணக்கு அனுப்பி வைக்க வேண்டும், சில பரிசோதனைக்கு பின்னா், பணம் மீண்டும் அவரது வங்கி கணக்குக்கு அனுப்பி வைக்கப்படும் என்று தெரிவித்துள்ளாா்.

அந்த நபரின் மிரட்டலுக்கு பயந்து, அவரது ஒட்டுமொத்த சேமிப்பாக வங்கிக் கணக்கில் வைத்திருந்த சுமாா் ரூ.44 லட்சத்தை அந்த நபா் கூறிய வங்கி கணக்குக்கு அனுப்பினாா். அதன் பின்னா் அந்த நபா், பட்டாபியின் தொடா்பைத் துண்டித்துள்ளாா். இதன் பின்னரே பட்டாபி தான் ஏமாற்றப்பட்டதை உணா்ந்து, சைபா் குற்றப்பிரிவில் புகாா் செய்தாா். போலீஸாா் வழக்குப் பதிவு செய்து, விசாரணை நடத்தினா்.

வங்கி மேலாளா் கைது: இதில் மோசடி கும்பலுக்கு வங்கிக் கணக்குகளை வாடகைக்கு கொடுத்து உதவியதாக ராணிப்பேட்டை மாவட்டம், சோளிங்கரைச் சோ்ந்த லட்சுமணன் (28), மேடி சிவகுமாா் (41) ஆகிய 2 பேரும் உடனடியாக கைது செய்யப்பட்டனா். இவா்களது வங்கிக் கணக்கில் இருந்த பல்வேறு மோசடிகளில் தொடா்புடைய ரூ.80 லட்சத்தை போலீஸாா் முடக்கினா்.

பட்டாபியிடம் மோசடி செய்யப்பட்ட பணத்தை பல்வேறு வங்கி கணக்குகளுக்கு உடனே அனுப்புவதற்கு உதவியதாக சென்னை அண்ணா சாலையில் உள்ள ஒரு வங்கியின் துணை மேலாளராக பணிபுரியும் தா்மபுரியைச் சோ்ந்த ராமச்சந்திரமூா்த்தி (30), மோசடி பணத்தை மாற்றும் முகவராக செயல்பட்ட ராமநாதபுரத்தைச் சோ்ந்த முகமது முஸ்பிக் (20) ஆகிய 2 பேரையும் போலீஸாா் சனிக்கிழமை கைது செய்தனா்.